Х1ара шера марта (г1алг1ай мархий бутт) бетта 24-ча таьрахьагара апрель (тушоле бутт) бетта 2-г1а таьрахьага кхаччалца йолча хана библиотекашка д1акхухьаш да Берий книжка хетадаь к1ира. Цу к1иран хьалахара ди   Шолжа района берий библиотеке д1адихьар къонача йоазанхочунца Матенаькъан Илезаца в1ашаг1кхетар  хулаш.

Мероприяти д1айолалуш берий библиотека кулгалхочос Евлой Аюпа Ра1шата моаршал а хаьтта, даькъала дийцар д1адоладенна ц1ай.  

Д1ахо, библиотека болхлочо Г1азднаькъан Хьавас йоазанхочун вахарах а кхолламах а лаьца дош аьлар, книжкайх а суртаех а латтача «Къона йоазанхо» яхача выставка а йовзийташ. Цул т1ехьаг1а дош делар хьаьшийна Матенаькъан Илеза. Цо кагий берашта а кхувш боаг1ачарна а 1алаьмате  пайдане хьехам бир: дешара сутара хилара т1ахьийхар уж, шоай вахара никъ шоаш хоржаш, дего т1аэцашбар харжар боаккхача маьхе хилар белгалдир, иштта берий хьаькъало хьаэцаргдолча бесса дуккха хьехамаш дир цо.

Билиотека болхло а йоазанхо а йолча Мухлой Рукъета дийцар шийна кердача книжках хетачох.

Мероприяте дакъа лоацаш бар Шолжара кеттера №2 йолча школа (ГКОУ «ООШ №2») 5-ча «б» класса дешархой а цар хьехархо а Г1азднаькъан Хьамида Аьсет.   

Ч1оаг1а самукъадоаккхаш а г1адвугаш а дар — берашта дагахьа автора цхьадола дувцараши фаьлгаши ховш хилар а цар мотт шаьра бувцаш хилар а. Иштта дика йийшар цар керда арадаьннача «Коа т1ара хьайбаши оалхазараши» яхача книжка т1ара лоацига байташ а.

В1ашаг1кхетар чакхдоалаш, Матенаькъан Илеза ше язъяь массехк байт йийшар, иштта, ловца баьккхар библиотека болхлошта, баркал а оалаш цар къонача т1ехьен сакхетам лакхбеш болх бараг1.

Шоай арг1аг1а, библиотекараша а баьккхар йоазанхочунна ловца, ше д1аболабаьча наькъ т1а толаме къахьега аьттув хилба, — аьнна.

       

 

Мухлой Рукъет

Берий книжкай к1ира д1адоладеннад

Добавить комментарий

Ваш адрес email не будет опубликован. Обязательные поля помечены *